O le afioga i le Ao o le Malo, Tuimalealiifano Vaaleto’a Sualauvi II ma lana Masiofo, na muamua afea e le afioga i le Kovana Sili o le faigamalo a Amerika Samoa le afioga Lemanu Peleti Palepoi Sialega Mauga, ina ua faagasolo lana polokalame o le Aso Lulu, a o talimalo Samoa i le vaega lona lua o le fono o le Atoa o Samoa, lea sa uluai usuia i Tutuila ma Manu’a i le masina o Iulai o le tausaga nei.
O le mae’a ona feiloai le Kovana Sili ma le Ao o le Malo, na feiloai atu ai i lē sa avea ma Palemia o Samoa o le taitai o le Itu Agai le susuga Tuilaepa Lupesoliai Sailele Malielegaoi, faapea foi ona feiloai atu i lē sa avea ma Palemia, avea ma taitai o le Itu agai, sa avea ma Sui o le Fono a Sui Tofia ma filifilia foi e avea ma Ao o le Malo, le afioga i le Tamaaiga afioga Tuiatua Tupua Tamasese Efi ma lana Masiofo, ae taualuga le feiloaiga a le Kovana Sili ma le Pelesetene Aoao o le Ekalesia Metotisi, le susuga Faulalo Leti.
O ia feiloaiga i le Aso Lulu sa faatino ai ma faaaloaloga maualuluga masani a le atunuu. E valu sefulu ma ona tupu le aumalaga a le Kovana Sili o Amerika Samoa, o sui o lana Kapeneta ma nisi o taitai o le faigamalo a Tutuila ma Manu’a, o loo talimalo ai le Malo o Samoa mo talanoaga o le Atoa o Samoa lea ua amata faagasolo i le Aso Tofi o lenei vaiaso, ae faamae’a i le Aso Faraile.
