Ua lapataia pasese faimalaga mai Brisbane e mataitu lo latou soifua maloloina mo le isi 14 aso ona o lea na fefiloi pasese I le malaevaalele I Brisbane
E lua pasese sa I le malaevaalele I Brisbane faimalaga mai atunuu o loo I totonu o le sone mumu ua toe maua nei na solia taiala o loo vaevaeina ai sone I lea malaevaalele, ma e faapea sa I le faleaiga a le Hudson lea na iai ma nisi o pasese o le sone meamata
E tolu faigamalaga taunuu uma I le afiafi ananafi ua lapataia nei, o le Ea Niu Sila NZ 202 mai Brisbane taunuu I Kalaiesetete I le afa o le 4 I le afiafi, o le Ea Niu Sila NZ 146 mai Brisbane taunuu I Aukilani I le afa o le lima, ma le Qantas QF 135 mai Brisbane taunuu I Kalaiesetete
O pasese toalua nei o le sone mumu na muai maua faaiuga o siaki o le Koviti I Papua Niu Kini ae e Ie i faimalaga ane I Ausetalia e negative, peitai I se isi siaki na faia ananafi na sau ai ua positive ae vaivai le toatasi
O le sone meamata o loo iai I le malaevaalele I Brisbane sa tatau ona iai na o pasese feoai I le va o Niu Sila ma Ausetalia
I ripoti mai le soifua maloloina I Kuiniselani e pei ona faaoo mai I le soifua maloloina a Niu Sila, o lea na faia tali fofoga o pasese toalua lea na solia taiala a le malaevaalele, ma o loo talitonu e maualalo le tulaga lamatia o tagata lautele
O lea faatoa lua vaiaso talu ona tatala le saolotoga I le va o Niu Sila ma Ausetalia, ma e le gata o lea na sao mai le pasese mai Perth sa le tatau ona sau I lenei vaiaso, ao lea foi ua fefiloi pasese o sone
