Ua ave nei se faamanatu tāua a le Matagaluega o Pisinisi Alamanuia ma Leipa, ia i latou o faagaioia galuega sikulati ma galuega leoleo po e lē gata i le vaega tuma’oti le private sector ae o faalapotopotoga tuma’oti uma a le Malo, ina ia tausisia itula mo ia galuega e pei ona aiaia i le tulafono o Sootaga Va Lelei o Leipa ma Galuega o le tausaga 2013 ma teuteuga o lea tulafono na faamamaluina i le tausaga na tea nei 2023.
O nisi o aiaiga tāua o lea tulafono e pei ona faailoa e lea matagaluega i se faasalalauga faalauaitele i ana upega tafailagi, e tatau ona lē itiiti ifo i le valu itula e malolo ai le tagata faigaluega, poo le va ma le isi aso e sosoo ai.
E lē tatau foi i le tagata e ana le galuega ona faafaigaluega faalausosoo se tagata faigaluega i le 12 itula e aunoa ma se malologa.
I le ma le tasi o vaega tāua o aiaiga o lea tulafono e tatau ona malolo se tagata faigaluega ia lē itiiti ifo ma le 36 itula faalausosoo i totonu o soo se fitu aso.
O le faamanatu a le matagaluega o pisinisi alamanuia ma leipa ia i latou e ana galuega o loo faafaigaluega ai sikulati ma leoleo po, o se solitulafono le lē usitaia o ia aiaiga o le tulafono o le va lelei o leipa ma galuega ma e faasala tupe ai se tasi pe a ia solia.
