Ua ave le fautuaga a le taitai o le Itu Agai, Susuga Tuilaepa L Sailele Malielegaoi i le Minisita o Tupe, Afioga Lautimuia Uelese Vaai, ina ia toe faatino le faiga sa iai i le taimi o lana pulegamalo, o le avea o le faauluuluga o le Matagaluega o Tupe a le Malo, ma taitaifono o le komiti faatonu o le faalapotopotoga o faaputuga tupe o le lumanai manuia o tagata poo le NPF (Samoa National Provident Fund).
O le finagalo o Tuilaepa ma lana fautuaga na folasia i le feiloaiga ma tusitala i le Aso Tofi o le vaiaso nei.
E iai le talitonuga o le finagalo o le taitai o le Itu Agai e mafua mai i lipoti ua faailoa ai ni faiga lē lelei ua tuuaia ai le taitaifono o le komiti faatonu o lea auaunaga a le Malo le susuga Papalii Panoa Tavita Moala.
O ni tuuaiga e pei ona lipotia e le nusipepa o le Samoa Observer, ua faia ai ni faaiuga a le komiti faatonu ua pasia ai ni nonogatupe mai le NPF a ni pisinisi ma se ekalesia e iai ni sootaga o le taitaifono.
Na saunoa le taitai o le Itu Agai i le feiloaiga ma tusitala, o se tulaga tāua na faia ai e lana pulegamalo le see atu o le faauluuluga o le tupe e avea ma taitaifono e aveesea ai ni aafiaga o tagata i le komiti faatonu poo le minisita o loo iai le vaaiga o le NPF ia i latou e talosagaina ni nonogatupe mai le faalapotopotoga.
