Ua toe faatino e le Malo le faatulaga o tau o oloa manaomia e tagata, peitai e iai faioloa e lē o usitai e tausisia tau ua faatulaga.
O le mafuaaga lea ua toe ave ai le fautuaga a le Matagaluega o Alamanuia Pisinisi ma Leipa o loo gafa ma le faatulagaina o tau o oloa manaomia tele, ia faailoa atu ni oloa ua soona sii tau ma lē mulimulitaia tau ua faatulagaina.
O Setema o le tausaga na tea nei na aumai faalauaitele ai le isi lisi o le tau o oloa ma o le lisi lea e tatau ona faaaogā e le aufaioloa.
Ua iai faleoloa ua latou faatau atu le kilo o le taumafa o le vaemoa i le 10 tala i le kilo, peitai o le tau o loo faatulaga mai e valu tala i le kilo.
O loo faaitiitia le maua o lea oloa taumafa i le taimi nei ona ua tuai mai vaa la’uoloa mai fafo.
