Ua toe lagona fautuaga o le Koviti mai ia Michael Baker.
O le po anapo na tausoa ai e le alii suesue se tasi o faailoga tauoloa ona o le faia o ona tiute o le taulogologo.
I lea sauniga na faaalia ai e Baker lona manaoga mo le malo ia saga faaleleia atili auala o loo talanoa mai ai i le atunuu e faatatau i le Koviti aemaise lava i auala o puipuiga.
A fua i faamaumauga o loo iai nei, mai tagata aafia i le Koviti e tasi selau, o le toatasi e ave i le falemai; mai le tasi afe o tagata maua i le faamai, e toatasi le tagata maliu ma i totonu o le 20 tagata e aafia pe itiiti ane foi, o le toatasi e umi ona faalogoina auga o le faamai poo le Long Covid.
O le vaiaso talu ai na sau ai le lapataiga mai le soifua maloloina o le taumafanafana poo le summer ua tatou iai nei e ono silia ma le 11,000 i latou e aafia i le aso ma le faitau selau o tagata e taofia i falemai.
Ma a o tapena atu ai la tagata Kiwi i aso fiafia, o le fautuaga ua toe sau mai a Baker, ia mautinoa ua faia tuipuipui, faia siaki pe a faalogoina auga ma faanofoesea pe a faamaonia ua maua i le faamai.
