Ua fautua mai leoleo i tagata e feaveaia fana, pe o ni fana moni pe leai foi i nofoaga faitele, e ono lamatia ai foi i latou i tulaga faapea.
Ua mafua lea lapataiga ona o le mataupu na alia’e mai i le vaveao analeila e pei ona lipotia i le televise tasi, na vaaia ai e nisi na malaga atu i se taavale i Aukilani le faaaliali ane o se fana ia i latou mai se isi taavale na ui ane i o latou autafa i luga o le Mount Wellington Highway.
Fai mai le lipoti o le mataupu lea na tulai mai i le tea laititi o le tasi i le vaveao, ma na faamatala ai e le molimau a o agai atu le latou taavale i le faaitu lea ae agai ane se isi taavale i autafa, faalala ane e le avetaavale o le taavale lea se fana agai ia i latou, o se faamatalaga lea mai leoleo.
Na mulimulitai ai le vaalele helicopter a leoleo i le taavale lea i le agai atu i Sylvia Park ma aveina ai e leoleo se alii ma se tamaitai mo suesuega.
Na maua ai i le suesuega e lē o se fana mo’i ma maua ai vaega o laau faasāina, ma ua molia ai le alii lea i le umia faasolitulafono o se fana lē mo’i.
O loo faaauau suesuega i le mataupu lea ae ua tuuina mai ai ma le fautuaga lea a leoleo i le feaveai o fana ma tulaga e ono oo iai.
