O loo finau le Palemia o le atunuu Chris Hipkins e tatau i avetaavale i le atunuu ona usitaia tulafono ma tulaga o iai auala ma faalemu taavale e ui ua aveesea le faiga faavae e faatatau i le saosaoa faatapulaa. 

Ua faailoa e le Palemia i le vaiaso nei o lana faigamalo ua toe faatulaga nei fuafuaga e pei o le silasila i le tau o le soifuaga ma galuega toe faaleleia talu ona mae’a le afā o Gabrielle ma ua talitonuina o lea faatatau o le a faasao ai le tusa ma le tasi le piliona a le malo.

Faailoa e le Palemia i le faatalanoaga i le AM e ui i fetuunaiga ua toe faia i faiga faavae ae o loo latou galulue pea i isi fuafuaga mo le faasaogalemuina o tagata e pei o le faaleleia o le puipuiga i luga o ala tetele, tele galuega i luga o alatele ina ia faasaogalemu ma ia faia foi pa puipui o le auala.

O le fuafuaga lea e faatatau i le faaitiitia o le saosaoa i luga o le auala o se vaega o le taumafaiga a le NZ Transport Agency Waka Kotahi mo le faamoemoe autu ia faaitiitia le aofai o soifua e ma’umau i luga o ala tetele.

O faamaumauga mai le matagaluega o Felauaiga ua ta’ua ai e 378 tagata na mailiu i luga o auala a Niu Sila i le tausaga talu ai 2022.