O le tamaitai lea sa feta’ua’ina lona faaoolima i lana tama teine e na o le lua tausaga ma iu ina uma ai lona ola, ua lipotia mai o loo tigaina ina ua faaoolima iai nisi i le falepuipui.
E faapea se faamatalaga na lipotia, o lea tamaitai na ia faaaoga se fasi paipa plastic i se talitonuga faalotu i Ausetalia, e tusa ma le 30 tausaga talu ai i Ausetalia ma sasa ai si ana tama teine e pe ā ma le 2 tausaga ma iu ina uma ai lona ola.
O le tamaitai e suafa ia Ellen Craig o se sitiseni o Niu Sila ae na faatonuina e toe faafoi i Ausetalia ia Mati e tulai ai i moliaga o le fasiotia o lana tama teine a o aumau ai i le nofoaga o le talitonuga, Ministry of God cult e lata i Sini i le tausaga 1987.
O le taitai o lea talitonuga e suafa ia Alexander Wilon o loo molia foi i le mataupu lenei ma sa fuafua uma e tatau ona tuuina ni a la tali i o la moliaga i le faamasinoga faaitumalo i Bathurst i le asō, Aso Tofi, 23 Fepuari, peitai ua logo ane e le loia a le tamaitai o loo molia, ua faaoolima tagata i lana client a o iai i le falepuipui ma o le taimi nei o loo i le falemai.
