Ua valaau ta’ita’i o komiuniti i Melepone i tagata ina ia maua le filemu i le mae’a o se faalavelave ua fana ai ma maliu se alii pese talavou i Melepone.
O le alii pese o Pal Bidong e faaigoa foi o Peezy na maliu i le itu i Matu o Melepone i le aso ananafi ma ua iai popolega ina ne’i toe tula’i mai se vesiga fia taui ma sui.
O le ta’ita’i o le komiuniuti o tagata Sudan i lea faaitu ma o se alii loia foi o Koto Monoah na ia faailoa i le 9News ua tuuina se tuualalo i aiga o le tama pese ua maliu ina ia maua se filemu.
Fai mai o faamatalaga ua maua ane e faapea o tagata talavou e vavalalata le latou sootaga ma lē ua maliu faapea ana uo ma aiga ua matua’i faanoanoa i le tulaga ua tula’i mai ma e ono iai se gaioiga e latou te faatinoina e tali atu ai i le mea ua tula’i mai.
Ua lipotia o lē ua maliu e lē o iai ni ona sootaga o iloa ai ni aafiaga i ni kegi ae ta’ua i nisi o molimau sa iai lē ua maliu i le nofoaga na tupu ai le faalavelave i se taimi sese.
Fai mai leoleo e lē o iai se lamatiaga o iai i le komiuniti ua na o ni kulupu o tama talavou e iai faafitauli, o loo lipotia na iai foi nisi vevesi na tupu i le po e mafua mai i le faalavelave lea ma sa osofa’ia ai ma se alii leoleo.
Fai mai e le’i maua le tagata na fanaina lē ua maliu ma o loo faia pea i le taimi nei su’esu’ega.
Puna o Faamatalaga: https://www.9news.com.au/national/melbourne-shooting-victim-rapper-warning/66f7381b-2e85-4d12-aaf8-f7f92d0512e0
