E le o se amataga lelei na iai le sauniga lotu o le Kerisimasi ina ua muamua fana le tagata i fafo i le kapaka ma maliu ai lava.
O le Ekalesia Aso Fitu i Puhinui Road i Manukau i Aukilani lea na tupu ai i le taeao o le Aso Toonai, ma e faapea o le tamā ua uma lona soifua na maliu ai lava i le nofoaga na tupu ai.
Na lockdown pe loka ai ma tagata lotu sa i totonu o le falesa i lea taimi, atoa ai ma tuaoi i totonu o o latou fale ae faagasolo suesuega a leoleo.
E tupu lenei faalavelave o le a amata le sauniga i totonu o le maota lotu ma o lea foi sa tapena aitema na saunia e fanauiti.
O loo iai le talitonuga o leoleo e na o le tamā lava ua maliu na taulai iai lē na alu atu ma le laau malosi, ma e tuufaatasia tala o le taeao e lei maua lē na faia.
I lipoti ma ata na faasalalau o loo maua mai ai le toatele o sui o le kegi a le Mongrel Mob sa i fafo o le nofoaga na tupu ai le faalavelave.
I lipoti a le Stuff, o le tamā ua maliu o Daniel Eliu, 46 tausaga le matua, o ia o se sui sinia o le Mongrel Mob.
E le masani a’i na faalogoina tala o ni osofaiga faapea e faia i se nofoaga e iai se falesa.
