O le faai’uga a Saina na fana a’e ai se a’upega o se missile aga’i i le Vasa Pasefika o se tulaga e faapopoleina ai ma e lē nofomālie foi i finagalo e pei ona faailoa e le minisita o le va i fafo a Niu Sila, Winston Peters i le lipoti a le Leitio faavaomalo a Niu Sila.
Fai mai o le ulua’i taimi lea ua fana ane ai sea a’upega agai i le Vasa Pasefika i totonu o le 44 tausaga ua tuana’i.
O loo faailoa i le lipoti se faamatalaga mai le ofisa o le puipuiga a Saina e faapea o le missile o se vaega o ana fetuuna’iga tau toleniga e faia ta’i tausaga ma e lei faatulaga aga’i i se atunuu ma sa pa’ū tonu foi i vaega o le sami sa fuafua aga’i iai.
Na saunoa Winston Peters e lē taliaina lea tulaga ma o loo aoina mai faamatalaga e tusa o lea gaioiga i le taimi nei ma o loo fesoota’i ma paaga mai le Pasefika e tusa o le gaioiga lea a Saina.
O le aoauli ananafi taimi Niu Sila lea o loo ta’ua na fana a’e ai se missile faata’ita’i lea i le Vasa Pasefika.
E tele finagalo eseese o ta’ita’i o atunuu o le Pasefika ua amata agiga i upega tafailagi e tusa o lea mataupu ma faailoa ai le tetee atu i ia ituaiga gaioiga.
Puna o Faamatalaga: https://www.rnz.co.nz/news/top/529140/china-launch-of-missile-to-the-south-pacific-concerning-minister
