Ua poloa’ina e le faamasinoga, County Court i Vitoria le alii o Jahdon Tamati 32 tausaga e nofo falepuipui mo le fā tausaga ma le ono masina ona o le mataupu na tula’i mai i le taimi o le tetele o le pepesi o le faama’i Koviti-19 i Melepone lea na maua lelei i se video i luga o le tiktok.

Na lipotia e le ABC i le asō ua 747 aso ua mae’a ona tuliina e Tamati ma e agavaa e talosaga mo le palola i le itiiti ifo i le lua tausaga ma le ‘afa. 

Fai mai le lipoti sa faaaogā e Tamati le fualaau faasāina o le aisa i le taimi na tupu ai le faalavelave ma ia ioeina ai nisi o moliaga e aofia ai ma le faaoolima i se tagata faigaluega emergency worker ma solia ai faatonuga sa tuuina ane mai le ofisa sili o le soifua mālōlōina. 

O le faamasino o Geoffrey Chettel na faia le faai’uga ae o nisi faamatalaga e pei ona agiga i le lipoti a le ABC ua ta’ua ai o Aokuso 2020 na taofi ai e leoleo le taavale a Tamati i South Yarra ma iloa ai o loo sailia foi e leoleo i le gaoiga o se taavale.

Na taumafai Tamati e sola ese ma leoleo ma tula’i mai ai se feteena’iga na i’u ina aafia atu ai ma isi taavale e tolu sa iai i lea nofoaga ma aafia ai ma le leoleo sinia Benjamin Ellison i ni manu’aga. 

Na maua Tamati mulimuli ane ma iloa ai ina ua aveina atu i le falema’i, o loo aafia foi i le koviti ma faanofoesea atu ai ma leoleo uma na aofia i lea mataupu lea na lauina i le asō le i’uga.