Ua amata tuli nei le faasalaga faafalepuipui e tasi le tausaga ma masina e ono, o lē sa avea ma sui komesina o le ofisa o le komisi o faigapalota le susuga Daryl Mapu ina ua faamaonia ona moliaga e ono, e aofia ai le umia o le pauta faasāina o le ‘aisa, umia o ni aupega o fana laiti, ma le umia o ututau poo pulufana.

O le Aso Tofi o le vaiaso nei na lau ai le faasalaga o Daryl, ae ua faailoa e lana loia i le faamasinoga ua faaulu le talosaga a lē ua faasalaina mo le taofia o le tuliina o le faasalaga sei suesue muamua lana talosaga ua toe apili ai le faaiuga ua faamaonia ai ona moliaga.

Ua taatia ia talosaga e valaau i se taimi o le a faatulaga mai ai e le faamasinoga se aso e suesueina ai, ae ua faaauau ona tuuina ai le ua faamaonia moliaga e tuli lona faasalaga.

Ua molimauina le faatupulaia pea o solitulafono e aafia ai le faaaogaina o le pauta faasāina o le aisa i Samoa, e pei ona iai se isi faaiuga a le faamasinoga sili, na fofogaina i le masina o Oketopa ua nofosala ai i le 2 tausaga ma masina e 3 le taulealea o Junior Pritchard poo Filifili Pritchard, ina ua ioe foi i lona umia o ia pauta faasāina, faapea laau faasāina o le maruana, ma le umia o ututau.

O se osofaiga a leoleo i le fale o le aiga o lea taulealea na maua ai aisa, o maruana ma pulufana.

E toafa isi o loo molia i lea osofaiga ae o loo latou teena moliaga a leoleo ma o loo faatali le valaauina o molimau a leoleo.