E faitau selau fale o Aukilani e lē o toe nofoia e mafua mai ina ua faaleagaina e lologa, o lea ua fai meaalofa mai le Council e lē totogia ni rates.

O faamaumauga mai le Council e i le va o le 327 ma le 836 fale o aiga e oo mai i le asō e le o toe nofoia, ma o le tele foi o fale nei o lea na maua le faamāmā avega mai le Council i le tau o rates o le 6 masina ua tuanai.

A o lei faia le faaiuga a councillors ananafi, o lea na amata talanoa e totogi na o le ‘afa o le tau o rates mo le tausaga faaletupe ua amata mai, mai le aso muamua o Iulai peitai o le fono ananafi na palota ai loa e lē totogia ni rates mo le isi 12 masina o i luma.

O se lafo na faatu mai e le councillor o Rodney, Greg Sayers ona o lea e telē le avega o loo amoina e tagata ua faaleagaina o latou fale.

E i le va o le $1.2 miliona ma le $3 miliona tupe lē maua mai rates o le a faamagalo.