E lē o mālōlō lava le faatino ai o galuega a le ofisa a le vāaitau, e tusa ai ma tulaga loulouā o le tau, a o le lē mālōlō ai foi o le tele o auaunaga o faalavelave tutupu faafuase’i i le tali atu i le tele o aafiaga ua iai le tele o faaitu o le atunuu.
Ta’ua i lipoti mai le NZ Herald le fetaia’i o ia faaitu ma timuga mamafa, ma savili malolosi mo nisi o faaitu i Mātū o North Island, ma molimauina ai le faateteleina o le loulouā o le tau e pei ona iai lōlōga ua faaleagaina ai le tele o fale ma nofoaga eseese; o lea na lē mafai ai ona feoa’i taavale i le Auckland Harbour Bridge.
E silia ma le 200 aiga ma nofoaga ua faamauina le motusia o le eletise i Northland, e pei ona māua na motusia mai lava i le po o le Aso Gafua, ina ua pa’ūū laau ma faaleagaina ai pou eletise.
E tusa ai ma faamatalaga, o loo iai pea fautuaga o timuga mamafa mo Northland se’ia pā’ia mai le aoauli o le Aso Lua, o Mātū o Harbour Bridge ma Aotea/Great Barrier Island o le a iai pea fautuaga ma galuega māta’itū se’ia pā’ia le 6 i le afiafi; ae mo Coromandel Peninsula o le a faatumauina pea fautuaga o timuga mamafa se’ia pā’ia le 2 i le vaveao o le Aso Lulu.
Ua fautuaina malosi foi e le vaega o faalavelave faafuase’i le Auckland Emergency Management tagata lautele ina ia māta’iūina pea le timuga o le a oo mai ma ia faaeteete le feoa’i ai o taavale i luga o auala ma ia ‘alo ese mai lōlōga tetele, a ia vave vili atu le 111 mo se fesoasoani.
Puna o Faamatalaga: https://www.nzherald.co.nz/nz/weather-persistent-rain-severe-gales-thunderstorms-to-plague-northland-auckland/BKTIBJWRJJDVPNH7F7Y5ET6CXM/
