O se tusi faalauaitele mo le tutufaatasi ma tamaiti o le aoga a le Freyberg High School o loo fetaiai ma faasalaga i le mae’a ai o se haka tetee sa faia i le taitai o le pati a le ACT David Seymour, ua saini ai le faitau afe ma afe o tagata i le atunuu atoa.
Sa asia e Seymour lea aoga maualuga i Palmerstorn North i lona tulaga o se Minisita lagolago o aoga i le vaiaso talu ai, ina ua fetaiai ma se haka a tamaiti aoga a o sauni e tuumuli ese.
O se tasi o tama aoga sa ia umia le fu’a a Maori ua iloa ai o le tino rangitiratanga flag, sa feanu i le palapala e lata i vae o Seymour.
O se vaaiga sa vave ai ona agai faiaoga ma isi e tutu i le va o Seymour ma tamaiti o le haka.
Sa faamatalaina ai e le uluaoga, Graeme Williams nei amio a nisi o tamaiti e matuā lē taliaina, pe a fua atu i le tāua ma le tulaga maualuga o le ta’uleleia o le aoga e mulimulitaia.
E oo mai i le po anapo ua silia ma le 7500 tagata ua sainia sea tusi e lagolago ai nei tamaiti aoga e aofia ai ma le teine pese ia Ria Hall ma le tamaitai fomai o le mafaufau Hinemoa Elder.
O lea tusi i luga o auala o fesootaiga lautele sa faavaeina e se tagata e faalilolilo, ma o le tagata muamua sa saini ai, o le tamaitai tusitala o Tina Ngata.
