E faitau afe i’a ua mamate ua tafefea ane i luga o se tasi o matafaga taatele mo maimoaga a tulisi i Ausetalia i Saute, o le matafaga lea e igoa o Middleton Beach ma ua lipotia o le i’a e foliga e mai le Murray River lea foi sa aafia i tafega tetele i se taimi e lei mamao atu.
Na faateia ai le autafafao i le matafaga ina ua vaaia se aui’a tele lea ua mamate ma ua faalogoina foi ma le manogi lē manuia ina ua fai si umi ona taatitia i’a i le matafaga.
O le mau a nisi o le autulisi sa iai e faatoa vaai lea i se vaaiga faapea ma o loo faia suesuega i le mafuaaga ae ua fautuaina foi tulisi ma tagata tafafao e le o iai se tulaga lamatia o iai o lea matafaga mo taelega aemaise o le vaitau o le tuua o aoga.
Fai mai nisi e le taumate o le a toe tafefea uma i le sami le aui’a e pei ona ta’ua ae manatu foi nisi e iai ma le avanoa e toe tafefea ane ai foi i le matafaga lava lea e fua lava i tulaga o le tala o le tau.
