Ua faailoa e le sui faipule o Faleata 4 le tofa Ale Vena Ale, ua mae’a ona lesitala sui o le komiti a le Fono Faavae a lona itumalo o Faleata 4, ma o le Aso Tofi nei e maua ai le $200 afe tala o le tupe faavae o le polokalame o le tasi le miliona tala mo itumalo faapalota uma e 51. Ua faailoa lea tulaga e le sui faipule ina ua tāpā sona finagalo e tusa o se finagalo ua lagomia o se tasi o matai o lona itumalo le susuga Moala Panoa Tavita ua sa’i ai i le Minisita o Tina ma Tamaitai Atina’e o Afioaga ma Aga Fesootai, i le lē talia o ia e avea ma sui o le komiti.
O se finagalo o le sui faipule o Faleata 4 le tofa Ale Vena ma le finagalo o le susuga Moala Panoa Tavita Moala.
O le tusi mai le Minisita o loo iai le vaaia o le polokalame o le tasi le miliona le afioga Leota Laki Lamositele Sio na ave i le faipule o Faleata 4 ae ave le kopi i le susuga Moala Panoa Tavita, o loo ia faailoa ai ta’iala e filifilia ai sui o komiti mo itumalo faapalota o le faipule o le sui o le vaega faaupufai e puipuia aiātatau a tagata. I sui e to’a sefululima o le komiti, e taitaifono le faipule ae sui taitaifono le sui lagolago o le Faatuatua i le Atua Samoa ua Tasi, o le sui taitaifono ma le failautusi o sui foi e lagolagoina le pati faaupufai ua avea nei ma faigamalo. I le aotelega e to’afitu sui e lagolago i le vaega faaupufai ua avea nei ma Itu agai, ae valu sui o le itu a le faigamalo i totonu o le komiti.
