E tele avanoa o le a faalauiloa ai i le lalolagi le auaunaga a le faletalimalo o le toe foi i le palataiso le Return to Paradise Resort i Matautu Lefaga, ona o lea ua osifeagaiga i se faigāpaaga ma se auaunaga faavaomalo i pisinisi o faletalimalo e ta’ua o le Radisson Hotel Group.
O le Aso Tofi o le vaiaso nei na faamautū ai lea faigāpaaga o se faitoto’a lelei e siitia ai le faletalimalo o le Return to Paradise ma faatosina ai tagata tafafao o le lalolagi e malaga mai i Samoa ma aga’i e nonofo i lea faletalimalo o le tatou atunuu.
Faaalia e le ta’ita’ifono o le Faletalimalo o le Return to Paradise, le afioga Aiono Hinauri Petana, o se ulua’i taimi lenei ua faipaaga ai se faletalimalo e umia ma pulea e tagata Samoa ma se auaunaga faavaomalo o le a mafai ona faalauiloa ai lo tatou atunuu ma faatosina mai ai tulisi.
E 117 potu o le faletalimalo o le Return to Paradise ma nisi o nofoaga ua saunia lelei mo malo mai fafo, faaopoopo iai ma le talafaasolopito o le nofoaga sa pu’e ai le ata tifaga o le toe foi i le palataiso o se faalauiloa tāua lea mo tagata tafafao.
Sa auai sui o le malo ma le pulega o lea faletalimalo i le faamautūina o le faigāpaaga i se sauniga sa faia i le nofoaga o loo iai le faletalimalo i Matautu Lefaga.
