Ua faalauiloa nei e le malo o Niu Sila, le faamatuu atu ai o le $1 miliona, o se meaalofa a le atunuu e fesoasoani atu ai i galuega lavea’i o loo faatino mo le atunuu o Sri Lanka talu ai tulaga pagātia ua iai nei ona o le afā tele o Ditwah.
I faamatalaga e tusa ai ma lea faalavelave, ua faitau selau tagata ua maliliu, e silia ma le luaselau tagata o loo tau sa’ilia ma le faitau afe ma afe o tagata ma aiga ua leai ni fale, ae o loo iai nei i apitaga ua tapena e malu ai nei tagata.
Ua tuu atu nei faamaisega a le Komesina Sili o Niu Sila i Sri Lanka mo aiga ua aafia ma ua motusia le mafutaga ma ē pele ona o lea faalavelave faalenatura, ma i le tuuina atu ai o ana faamaisega, o lea na ia faamaonia ai le tuuina atu o le tau’au fesoasoani a Niu Sila e tauala atu ia latou paaga faavaomalo.
Faaalia, o lenei seleni tele o le a fesoasoani lea i auaunaga o fesoasoani muamua i faalavelave tutupu faafuase’i (emergency response), o le maua ai o mea e moomia i le atunuu (essential supplies) ma fesoasoani atu ai i nai aiga ua leai ni fale (recovery for those displaced or impacted by the severe storm).
Puna o Faamatalaga: https://www.dailymirror.lk/breaking-news/New-Zealand-contributes-NZ-1-million-to-support-emergency-humanitarian-relief/
