O loo faafaigata I tagata Pasefika ona maua avanoa e saili togafiti ai I le falemai

O le molimau lea a le taitaifono o le ASA Foundation, Tuala Tagaloa Tusani ua maua nei I le Koviti I tala a le TV1

O Tuala na taofia ai ma lona faletua I le maota gasegase I Middlemore I Aukilani mulimuli ai te’a I le faletalimalo a le Novotel e faanofoesea ai

Peitai o le tigaina tele ona o le ulu tiga, le mafai na moe faatasi ai ma le faafaigata ona manava o le faletua na taumafai ai loa e faatalosaga le aufaigaluega mo se fesoasoani

Peitai na tali ane na o le Panadol, ma na faailoa foi iai ua moomia vave se fomai faapea se ambulance

Na iu lava ina toe valaau e Tuala lana ia lava ambulance, itula mulimuli ai faatoa maua atu le avanoa o le faletua I le falemai ma e faapea na collapse pe pau I le taimi na oo atu ai I le falemai

Ua talosaga ai le Pacific Leadership Forum I le soifua maloloina ina ia vave ona faia se suesuega I le taofiofi o tagata ua maua I le Koviti mai le agai atu I le falemai

O le 74% o cases faamaonia o le Delta o loo iai nei o tagata Pasefika, ma o le toatele lava o tagata Samoa

I molimau a Tuala, e le na o ia o loo ui ai o lea foi na ia maua tala mai isi o tatou tagata ua oo I le lagona faavaivai ona o le le leai o se fesoasoani

O le vaiaso talu ai lea foi na sau ai tala o faitioga a tagata Pasefika o loo faanofoesea ona o le le lelei o meaai faapea vaiinu