Sa manatu Ausetalia o le a tulai mai se tasi o upset tele i le Ipu o le lalolagi i le taaloga o le soka i le taeao analeila ina ua maua le sikoa a le Socceroos a Ausetalia i le amataga o le la fetauiga ma le ‘au malosi a Farani.
Peitai a o faasolosolo pea le taaloga na toe tali mai le siamupini o le lalolagi i sikoa e fā na iu ina manumalo ai e 4-1.
Tele vaega o Ausetalia sa faapotopoto ai lana autapuai mo le taaloga lea e aofia ai ma le Federation Square i Melepone lea na lipotia mai ma se vevesi a le aumatamata, tau’ai solo ai fagu tulou ma pailima ai nisi o le autapuai, lipotia ai foi ma le fu’a a Farani ua gaoia e nisi.
E ui i lea e lua isi taaloga o loo totoe a le Socceroos mo le sailiga o so latou avanoa i le finals o lenei tausaga i le Ipu o le lalolagi a le FIFA.
