Na faia’ina le aulakapi i lalo o le 20 tausaga a Niu Sila i le la fetauiga ma le ‘au a Farani i taaloga o le Ipu o le Lalolagi i le vaega lea ma o ‘ai o le taaloga 35-14.
Ua lipotia mai i tala o taaloga i le asō sa tulaga ese ai le taumafai a le alii o Posolo Tuilagi le alo o Henry Tuilagi sa taalo foi i le Manu Samoa.
O Posolo o loo taalo mai i le ‘au a Farani ma e faalua ona sikoa i lea taaloga.
Na timuga le taimi o le taaloga ma o le faia’ina i le asō ua tulaga tolu ai i latou i le latou pulu a o faatali ai le la taaloga ma Iapani.
O le isi taaloga na faate’ia ai le toatele i lona faaiuga o le fetauiga a Aferika i Saute ma Italia na malo ai Italia i ‘ai e 34-26.
O loo faaauau pea le taamilosaga.
