Ua faagasolo nei suesuega a le Matagaluega o Leoleo i le aafia ai o se pasi la’upasese i se afi i fafo ane o le fale o le avepasi i Lotofaga Aleipata.

Taua e le Sui Komesina o Leoleo na logoina le Ofisa o leoleo i Lalomanu i lea faalavelave i le itula e 7 i le taeao o le Aso Sa. E lua pasi na paka i fafo o le fale o le avepasi peitai e itiiti le aafia o le isi pasi ona o le agai atu o tagata o le afioaga ma le aiga e tau tape lea mala.

O le aiga i le ave pasi na faafesootaia leoleo ma o latou taua iai latou o le afi na amata mai I fua o pa’u o le pasi ma sosolo atoa ai ma faaleagaina lea meatotino. O lē e ana le pasi e mai le afioaga o Saleapaga ma e mo pasese mai lea afioaga e agai atu i Apia.

I suesusega a leoleo o loo faagasolo nei o loo masalomia o se tasi na faia lea tulaga e iai sona faagaulēmalie i le ave pasi e ui o loo tele faasalalauga a nisi i luga o upega tafailagi e masalomia ai ni tulaga faapolokiki na mafua ai lea faalavelave aua o lea na tulai mai i le afioaga o le tamaitai Palemia . 

O le taimi nei e talitonu le matagaluega e leai se fesootaiga o lea faalavelave ma le feeseeseaiga o lagolago a tagata i vaega faaupufai aemaise o loo loma ai palota laiti ma o loo faaauau pea sailiiliga a le Leoleo i lea mataupu.