O suesuega a leoleo i polokaina o se vaega o le alatele o le malo e nisi o tupulaga o le afioaga o Salelologa i le aso na faatino ai se solo taavale a le vaega faaupufai a le HRPP i Savaii e to’alua ni alii o lea afioaga ua molia nei e leoleo ae o loo faagasolo pea suesuega.
Ua faailoa e le sooupu a Leoleo le susuga Auapaau Logoitino Filipo o loo agai foi suesuega i se gaoiga na poloka ai foi se vaega o le alatele i Sasina.
E oo foi i le gaioiga na faapa ai se laau malosi i Salelologa ua faaalia e le sooupu ua faia foi iai sailiiliga mo le fia maua o ni mau e avanoa ai ona faia ni moliaga faasolitulafono.
O se tasi mataupu o loo suesueina nei e malu o le Mālō o le gaioiga ua masalomia ai se faiga solitulafono i le faatulai ese o se aiga mai le afioga o Faleū Manono aemaise o le masalomia o ni tagata na latou taumafai e faatupuina se mu i le maota o le aiga ua faatulai ese.
E le gata sa taumafai e faatino lea tulaga i le falenofo se faapea le faleoloa o le aiga.
Faaalia e Auapaau o le afiafi o le Aso Lulu na fono ai matai o le nuu ma ave ai le tuualalo i tupulaga e taofi le toe faia o se isi gaioiga i meatotino a le aiga.
E le’o mautu se silafia a le sooupu a le matagaluega o leoleo i le mafuaaga o le faaiuga a Alii ma Faipule e faatulai ese le aiga ae o lana saunoaga mai, e sāua i le lana faalogo e mafua i le lē usitaia e le aiga o le tasi o le Nuu i le sui tauva o le palota tele ia Aperila na ave iai le lagolago a le afioaga.
Na faatino e leoleo le gaioiga na aveesea ai le aiga mai lo latou maota ona o le puipuiga o le saogalemu.
