O le Aso To’ona’i na te’a nei na atoa ai le masina va’aia ma amata faitau ai le po fitu o le atoa o le masina lea e faitau i ai le taāga muamua o le palolo i le masina fou o Oketopa. Ua faamauina e le Ofisa a le Vaaitau o le aso 4 le Aso Sa muamua o Oketopa e tā ai le palolo, lona uiga o le asiga muamua o le po o le Aso Faraile a’o lumanai le vaveao o le Aso Toonai nei, ma le asiga lona lua o le po o le Aso To’ona’i a malama le vaveao o le Aso Sa.

E leo iloga ona pa’ū ni timuga mamafa e pei ona faitau iai le toatele o le atunuu o faailoga ia e iloa ai e tetele le palolo, aemaise o le fua o laau manogi epei o le mosooi ma le lagaali, ae momoga ai le figota o le tuitui, vaga ma le sava’i. O loo talosia e le au tatā o nu’u e maua ai le i’a, a tetele le palolo o le a fetaui lelei ma ni fa’atauga ofu e faotaga ai ni tupe se tele auā fa’atauga o le Aso Sa o le lotu a Tamaiti i le vaiaso fou.

Advertisement