Ua amata lenei masina fou o Oketopa i le fa’alauiloa masani i taumafaiga e tete’e atu i le gasegase faigata o le kanesa, aemaise le itu tāua o le vave iloa o āuga ma amata ona fai togafitiga ae e le’i oo ina ogaoga ma tugā aafiaga o le gasegase e aafia ai se tagata.

O fa’amaumauga o loo fa’ailoa i upega tafāilagi a le Matagaluega o le Soifua Mālōlōina ma auaunaga tuma’oti o loo mata’itūina le kanesa o loo fa’ailoa ai le maualuga pea o le pasene o tinā i le atunu’u e maua i le kanesa o le susu po’o le breast cancer, pito atu iai isi ituaiga o kanesa.

O le feau tau molimoli foi lea mai le Minisita o le Soifua Mālōlōina ina ua tatala aloa’ia polokalame o le Oketopa piniki poo le Pinktober, ia fa’aaoga e le atunu’u auaunaga o loo maua e aofia ai le Matagaluega o le soifua maālōlōina mo le siakiina o āuga o le gasegase o le kanesa.

Se vaega o le saunoaga i le gagana Peretania a le afioga i le Minisita o le Soifua Mālōlōina le tōfā Va’aaoao Salumalo Alofipo i le tatalaina o polokalame faalauiloa o le Oketopa piniki mo le tete’e atu i le kanesa, o loo taulamua ai le Sosaiete o le Kanesa i Samoa faapea nisi o auaunaga tuma’oti e pei o le faletupe o le ANZ i Apia.