Na lipotia le faia o tetee a tamaiti aoga o le Iunivesite o Vitoria i Ueligitone i le taeao ananafi agai i le pulega a le iunivesite ina ia finau mo se iloiloga a le malo e faia ina ua maua tala i avanoa faigaluega e 230 o le a vāea tagata faigaluega mai le Te Herenga Waka i le Iunivesite.
O tamaiti aoga na vaaia a latou tetee i le Hunter building i le Iunivesite i le vaega sa faia ai le fonotaga a le Council.
O le faamatalaga mai se tasi o sui o le Council a le Iunivesite, John Allen i le Stuff, e lei fia oo le iunivesite i le tulaga lea o le aafia o tagata faigaluega ae e tatau ona gaioi e faatino se tulaga mo le faasaoina o le lumanai o le aoga ma e le mafai foi ona nofonofo le aoga ma faatalitali poo le ā se gaioiga a le malo.
Na faailoa foi e le sui lea o le Council e faafetaia le sao o tamaiti aoga i le unaia o latou e faatino ma unai mo se fesoasoani, o se tulaga foi e ono faatalitalia mai tamaiti aoga i se iunivesite.
