Ua galulue faatasi nei le Defence Force a Niu Sila ma le aulakapi liki a Niu Sila le One New Zealand Warriors e faatautaia se taaloga lakapi liki e taaalo ai ma le ‘au a le Gold Coast Titans, mo le faamanatuina o le ANZAC Day i le aso a taeao.
O se faamoemoe ua manatu e ao ona faamanatuina lelei, ma i lipoti mai le itulau i luga o upega tafailagi a le NZ Defence Force (NZDF) o le lona lua ai lea o taimi ua talimalo ai Niu Sila i lea faamoemoe i le 9 o tausaga talu ona amata faatino nei polokalame, lea na faamanatu ai le 100 tausaga o galuega faalauiloa mo Gallipoli i le tausaga e 2015.
I lipoti, na saunoa ai le Pule Sili o le One New Zeland Warriors ia Cameron George, i lo latou mitamitaga e talimalo i lea taaloga tāua.
Na ia faasoa foi, e tatau ona faamanatuina e le Lakapi Liki (NRL) lea aso faapitoa, aemaise o se aso tāua mo atunuu e lua (Niu Sila & Ausetalia).
Na faafetaia foi e le Pule Sili le NZ Defence Force i lo latou foi lagolago, ma le tau’au fesoasoani i le tuufaatasia o lea polokalame.
Ua faamauina o le a faapea ona taaalo le NZ Warriors ma le Gold Coast Titans i le aso a taeao, ma le naunauta’iga o le a faatumulia lea taaloga.
O le a faapena foi ona auai le tele o sui o loo tautua i le NZ Defence Force, pe silia ma le 150 o i latou.
Ta’ua i lipoti, o le a faapena ona iai se helikopa a le Royal New Zealand Air Force A109 o le a momolia atu le polo lakapi o le a faaaogā mo lea taaloga.
O le a iai foi le tele o auupega tau militeri i le malae mo lea faamoemoe.
O le a faatautaia le taaloga i le Go Media Stadium.
Puna o Faamatalaga: https://www.nzdf.mil.nz/media-centre/news/new-zealand-defence-force-teams-up-with
