Ua tatala nei e le lesitala o le Palemene a Niu Sila se suesuega i le mataupu o sea poo shares a Michael Wood i le malaevaalele i Aukilani.
O Sir Maarten Wevers le lesitala ma i sana faamatalaga tusitusia ua faamatuu ane ua ia ta’ua ai sa maua atu sana tusi mai le faipule o Chris Penk e talosagaina ai le faia o se suesuega i le mataupu a lē sa avea ma minisita, ma i le mae’a o se iloiloga na faia i le mataupu ua manatu ai le lesitala ua alagatatau ona faia se suesuega.
O Michael Wood o le faipule o Mt Roskill ma o se minisita foi o le Kapeneta o loo faamalolo lē tumau i le taimi nei ae ua faailoa i le lipoti a le Stuff e umia e Wood le silia ma le 1,500 o sea, pe ā lea ma le 13 afe i le malaevaalele i Aukilani, o sea sa ia faatauina a o talavou.
Fai mai le lipoti sa faailoa e Wood shares ia i le taimi na avea ai ma minisita o felauaiga, faailoa agai i le ofisa o le Kapeneta ae lei faailoaina i le tulaga o mataupu tau tupe a sui a faipule.
Fai mai se faamatalaga a Wood o lea ua malamalama nei i le mea sa’o sa tatau ona ia fai ma o le a faia loa.
