O le ave o le talosaga a alii ma faipule o Levi ma Alamutu i Saleimoa i le ofisa o le Komesina o Sulufaiga, faapea le faaseā ua faato’ai i le vaega o amioga taualoa a leoleo e mafua i le luaafe tala, na ave e le sui Faipule o Sagaga 2 ae o se matai faiupu foi o le afioaga o Afega ua faia nei iai se suesuega faalotoifale a le matagaluega o leoleo, falepuipui ma le ola toe fuataina.
O le faatoa maua ai o se kopi o le ata video na pueina le feiloaiga a nisi o matai o Afega ma Malu o le Malo sa faatinoina tiute o le tausia o le filemu ma le puipuiga o le saogalemu a o faataoto le tuaoi o fanua o Afega, o loo māua ai o lea seleni o se meaalofa mo Malu o le Malo ona o le latou galuega
Peitai o loo tuuaia e alii ma faipule o Levi ma Alamutu i Saleimoa o se faatosina poo se bribe.
O le siufofoga o le tofa Maulolo Tavita ma le leoleo asiasi na fai ma fofoga o Malu o le Malo e faafetaia ai le meaalofa tupe.
Sa fesiligia le matai sa avea ma sui o alii ma faipule o Levi ma Alamutu i le aso na feiloai ai ma tusitala, poo le ā sona finagalo i le seleni sa ave o se vaega o tu ma aganuu a Samoa.
Le sui o alii ma faipule o Levi ma Alamutu susuga Umuiletainafiletuamasaga Pati Muaau.
O loo aiaia i le vaega 40 o le tulafono a leoleo vaega e faasino i le taliaina o ni meaalofa i se tulaga e fesiligia ai le faatinoga o le latou galuega.
