O le solo taavale a sui lagolago a le Faatuatua i le Atua Samoa ua Tasi i le taeao nei e faaali ai le mauaa o le latou lagolago i le faigamalo fou a Samoa ae le gata i lea o le latou lagolago i le faamasinoga.

O lenei faamoemoe na amata i se sauniga lotu na faia i le maketi i Salelologa ona faagasolo ai lea o le solo taavale. O le mau a nisi o matai na auai i lea solo o le auala lea e faailoa atu ai o le malo na tofia e Savaii o le FAST lea ma e tumau ai le latou lagolago.

Ua silafia e le toatele tulaga na tulai mai i le vaiaso na te’a nei lea na poloka ai e le afioaga o Salelologa le auala . Na molimauina ai foi le faapāpā o ni laau malosi ma tonu ai loa i le taitai o le HRPP ua tatau ona toe foi i Upolu ma taofia ai loa lea solo taavale.

Peitai o le vaiaso nei lea ua faia ai se solo taavale a sui o le Faatuatua i le Atua Samoa ua Tasi i Salafai. Taua e le toatele o le tali atu lea i le HRPP e tumau le lagolago a Savaii i le malo fou ma le faamasinoga ae le gata i lea ia faatumauina pea le tofiga faamasino Sili o le afioga ia Satiu Simativa Perese. Na o latou taua foi o le isi mafuaaga o lenei solo taavale filemu ina ia toe faafoi le faavae o Samoa i le tulaga sa iai.

E toatele i latou na auai atu i lea faamoemoe i le taeao nei ma na fai foi se fa’aafe a le afioaga o Sasina i lea solo ta’avale.