O le sā mai le 6 i le afiafi seia oo atu i le 6 i le taeao o le isi aso, ua poloaiina e le Faamasinoga Maualuga mo le talavou na ia faaoo manu’aga tuga i le avetaavale la’upasese.
Saunoa le alii faamasino ia Fepuleai Ameperosa Roma e tatau ona iai lea talavou i lona aiga mai taimi ua ta’ua ma ia aua lava ne’i toe agai i se isi mea i ia taimi.
O loo tulai le tamaitai loia ia Lusi Ofoia mo le talavou ma sa ia talosaga ina ia tapu ona faasalalau le igoa o lea alii, lona nuu ma le aoga e aoga ai.
Sa talosaga foi le tamaitai loia i le Faamasinoga ina ia tuu atu le mataupu i le vaiaso fou se’i talanoa atu i le alii.
O le talavou lea o loo molia i moliaga e tolu o le fuafua e faaoo le oti, o le faaoo manu’aga tuga ma le faaaupegaina i se aupega matautia.
E lei tuuina atu se tali a lea alii 15 tausaga i le Faamasinoga i ona moliaga ae o loo tatala lea alii i tua i aiaiga e faatali ai le Aso Gafua o le vaiaso fou.
