O le a tuufaatasi se kulupu e na te suesueina se faiga e mafai ai ona feoai saoloto pasese i le va o Niu Sila ma Ausetalia e aunoa ma le toe tapa o tusifolau.
O le tala mai lea i le feiloaiga a Palemia a atunuu e lua, Chris Hipkins ma Anthony Albanese ananafi i Ueligitone a o talimalo ai Hipkins i le malaga mai o Albanese.
O loo manino mai i lea feiloaiga e tatau ona maua mai se tali manino o ia suesuega i totonu o le 12 masina ma na saunoa Hipkins e le gata o le a faafaigofie i turisi, pisinisi ae faapea ai ma tuaoi.
O se mataupu ua oo iai talanoaga i le mae’a ai ona laga mai e le Pule Sili o le vaega o turisi ma femalagaa’iga a Ausetalia, Margy Osmond ma o lea na talosaga e amata faataitai i le faaiuga o le 2023.
E le gata i le va o Niu Sila ma Ausetalia ae o lea foi na talanoa ai ananafi i le sao o atunuu e lua i le Pasefika, o puipuiga aemaise ai o le tamaoaiga i lona aotelega.
O Iuni o le tausaga fou e toe lipoti mai ai le kulupu o le a iloiloina lenei suiga tele, ma o le asō e toe foi ai le Palemia o Ausetalia.
