Ua sau le faatonuga mai le malo ua tatau ona mamafa faaiuga e faia i tagata o loo nonofo i fale o le malo ma o loo faatupu vevesi.
O le faatonuga lea e tauala mai le Minisita o fale, Chris Bishop e pei ona tuuina atu i le Kainga Ora, ma o le tusi foi ananafi o loo manino ai faamoemoega o le malo mai le fuafuaga ua faataatia mai.
O manaoga o le malo o le toe silasila toto’a i tagata o loo nonofo i fale nei o le malo ma o loo faatupu vevesi, ma ia faia se faiga vave i le tele o peimeni o loo nofo aitalafu ai nisi; aemaise o tupe alu ma tupe faasao a le pulega.
E ese mai i tagata faatupu vevesi, o le lē totogia o fale nofo totogi o le malo le isi itu o loo sau i le faatonuga e pei ona ta’ua mai o le va o le 2017 ma le 2023, ua faatupulaia mai le $1 miliona i le $21 miliona tupe o loo nofo aitalafu ai nisi o tagata i fale o le malo, ma a tuu i le fuainumera o aiga ua alu i luga mai le 4248 i le 9519.
E oo mai i le faaiuga o le tausaga talu ai, e silia ma le 450 aiga o loo nofo totogi i fale o le malo e tofu lava le aiga ma le aitalafu e silia ma le $10,000.
Ae i le lisi o tagata o loo faatalitali mo ni o latou fale i fale o le malo, o lea ua silia ma le 25,000.
Saunoaga a le Minisita ananafi mai Ueligitone, e lē o se manao o le malo e faatupulaia le fuainumera o tagata e tutuli ese ma fale o le malo ona o le faatupu vevesi, peitai ia lelei amio.
A tuu mai foi i aitalafu poo tagata e lē o totogia rent, fai mai le Minisita, e lē o se mea lelei e lē gata mo aiga nei a o tagata totogi lafoga foi ma ua moomia le faia iai o se gaioiga a le Kainga Ora e foia ai le faaauau pea ona tupu i le alu i luma.
