O loo iai nei pea leoleo i le nofoaga lea o loo lipotia le iai o le tele o pailate o iai uta o apa pia lea e faapea ua iai faatasi ma le fualaau faasāina o le aisa lea na maua i le afiafi ananafi.
O le warehouse i Ryan Place i Manukau na osofaia e leoleo faaaupegaina ma o loo ta’ua i le Herald se molimau a se tasi o tagata faigaluega mai se pisinisi lata ane i Manukau lava e faapea na ia vaaia taavale e ono a leoleo ma leoleo faaaupegaina i le nofoaga lea i le afiafi ananafi.
Ua faasāina nei lea nofoaga ma o loo iai pea leoleo i le taimi nei ae leai se isi tagata o faatagaina iai.
O se faamatalaga mai le sooupu a leoleo i le lipoti lea ua ta’ua ai sa faataunuu se suesuega e leoleo i le tuatusi lea i Manukau ona o se poloaiga ina ia suesueina, search warrant.
Fai mai o loo faaauau pea suesuega ma e le mafai foi ona tuuina mai se faamatalaga ona o loo faaauau pea le sailiga.
Ua tulai mai lea tulaga i le mae’a ai ona tuuina o se lapataiga e leoleo e faatatau i se uta o le apa pia lea o le Honey Bear House Beer i le Aso Toonai lea na feta’ua’ina o apa pia o loo ono aofia ai ma se vaega o le fualaau faasāina o le aisa ma o le inumia o pia ia e telē sona aafiaga e iai i le tulaga tau le soifua maloloina.
O loo suesue foi e leoleo pe ono iai se sootaga i le maliu o se alii ma le apa pia lea o loo aafia i le aisa ma e le mafai ona faailoaina le suafa o lē ua maliu ona o mafuaaga faaletulafono ae ua lipotia e le Herald na maliu i le Aso Lua talu ai i le falemai i Aukilani.
Fai mai leoleo e manatu e lei faatauina i luga o le counter poo luga foi o upega tafailagi le apa pia lea lanu moana ma le mumu peitai o se vaega o le uta lea e foliga sa tuuina i nisi.
Ua talosagaina e leoleo nisi o umia apa pia ia o le Honey Bear House Beer ia aua nei tagofia ma ia fesootai vave ane i leoleo pe valaau foi i le crime stoppers.
