O loo faagasolo pea su’esu’ega a leoleo i le faalavelave tau taavale lea na tula’i mai i le afioaga o Toamua i le vaiaso na te’a nei.
O lea faalavelave e faapea lipoti na feto’ai ai taavale e lua ma i’u ai ina taofia i le falema’i avetaavale o taavale e lua ona o manu’aga tugā.
Ta’ua e le Sui Komesina o Leoleo Papalii Monalisa Tiai Keti i le Samoa Observer o taavale na aafia e aofia ai se Nissan AD na faafoeina e le alii 53 tausaga le matua o Lalovaea ma se Toyota Townace na faafoeina e se alii 40 tausaga o le afioaga o Malie.
Ta’ua e Papalii o le saoasaoa tele le mafuaaga o lea faalavelave ma o loo masalomia foi e aafia ai ma le ‘ava malosi. E matuiā tele le faalavelave ona sa faafaigata i le pulega o faalavelave faafuase’i ma leoleo ona faatino le galuega ma faanatinati atu le aulavevea i le falema’i.
E ono iai ni moliaga o le a faia pe a mae’a su’esu’ega a leoleo i lea faalavelave matuiā.
