Mo le uluai taimi o le a faia ai le tauvaga mo aufaipese i Niu Sila lea e faaigoaina o le Musika Moana Choir Competition.
O le a maua ai le avanoa o aufaipese a komiuniti a le Pasefika e faailoa ai a latou taleni pese ma siufofoga matagofie, pe afai e auai i le tauvaga a aufaipese, le Musika Moana Choir Competition ua tuufaatasia e le Pacificast ma le Signature Tautai Trust.
I se pepa o faamatalaga o lea faamoemoe ua ta’ua ai o le Musika Moana Choir Competition e faamanatu ai le fiafia i le pese ma le malosiaga e faia ai se suiga e pei ona saunoa ai le sooupu o le faamoemoe, Helen Tupai.
Fai mai a ia o lenei tauvaga e lē na ona faaali ai o taleni a aufaipese mai le Pasefika ae e faailoa ai foi le malosiaga o o tatou komiuniti , le ‘oa o aganuu a le Pasefika ma le omai faatasi e ala i le musika.
O le tauvaga o le a faia i Ueligitone, Aukilani ma Kalaiesetete ma o le a aofia ai ma faamasino mai vaega eseese o le atunuu ua tele lo latou tomai i musika a le Pasefika.
O faailoga tupe o le a manumaloina i lea tauvaga e oo atu i le 100 afe e faaalu ai ma le faamoemoe o le a faaaogā ia seleni i poloketi e faaleleia ai le komiuniti.
E tatala le avanoa i aufaipese uma a le Pasefika mai Niu SIla atoa ma e tatau ona lua pese e peseina e le aufaipese, o le pese o le tauvaga ua tuufaatasia e Tupai ma le pese e fili mai e le aufaipese lava ia.
E pule le aufaipese i le gagana a le atunuu Pasefika e usuina ai le latou pese.
O le tauvaga i Ueligtone o le a faia i le aso 7 o Setema, Aukilani i le aso 21 o Setema ma Kalaiesetete i le aso 28 o Setema.
E maua atili nisi faamatalaga i lenei tauvaga aemaise le auala e faaulu ai aufaipese mo le Musika Moana Choir Competition, pe a tagai i le latou upega tafailagi, www.musikamoana.com e imeli i le admin@musikamoana.com
E iai foi le latou itulau i le facebook ma le Instagram.
