O le fonotaga muamua a le asosi lenei o le a faia i le faaiuga o le vaiaso nei o se faamoemoe lea e mafai ai ona mafuta faatasi i latou o loo faia nei faasao ma le mamalu o le atunuu ma nisi o loo faia nei faasao ae le o auai i lenei faalapotopotoga.
O le a faailoa ai foi le tulaga o lipoti mai nisi o polokalame a le faalapotopotoga i masina ua tuanai ma o se avanoa foi e faasoa ai auala ma metotia e faia ai se faasao o lagomeli lea e mafai ona gaosia mai ai le honey.
O le sini autu lava ia galulue faatasi e faia faasao mo nei manu o loo faapea ona maua ai nisi o oloa gaosi i le atunuu.
O le vaiaso ua tuanai sa faagasolo ai polokalame a le faalapotopotoga i afioaga i Upolu ma Savaii i nofoaga o loo faasao ai lagomeli.
O nei asiasiga ma polokalame sa faatino i Upolu ma Savaii o le a folasia ai faamaumauga ma lipoti i lenei fonotaga.
O nei polokalame sa mafai lea ona fesoasoani ai le ofisa o polokalame mo atina’e a Malo Aufaatasi i Samoa e ala lea i ana fesoasoani tau tupe poo le Global Environment Facility Small Grants Programme.
