O le masina atoa o Fepuari ua mavae atu nei na faia ai se galuega fesoasoani a ni vaa leoleo a le gataifale se lua a le Mālō o Amerika na latou leoina ai ogasami faatulafonoina o le atunuu.
O se galuega sa mataituina ai vaa fagota e le tatau ona ūia ai ogasami o le atunuu mo ni fagotaga poo ni vaa foi e faia solitulafono i ogasami a le atunuu faatulafonoina.
Ua faailoa i se pepa o faamatalaga o ia vaa leoleo e lua o le gataifale a Amerika sa auina mai i se fesoasoani a lea Mālō ao toso ai e Ausetalia le vaa leoleo o le Nafanua mo le toe fonofonoina o faaletonu e mafua ina ua pa’ulia i se vaega o le aau i le ava e ofi atu ai vaa i le uafu i Salelologa i Savaii.
Ua faaalia e le Amepasa o Amerika mo Samoa o le fesoasoani a lona Mālō o se faailoga vaaia lea o le faatumauina pea o le galulue faatasi o taitai o Mālō e lua.
E le’o iloa se masina e toe malaga atu ai le Nafanua i Samoa mo le faaauauina o lana tautua o le leoina o le gataifale ma ogasami uma o Samoa.
