O lea ua faagasolo a’oa’oga mo nisi o le atunuu ua filifilia e galulue fesoasoani i le auaunaga a Malu o le Malo poo leoleo i le taimi o le a faagasolo ai le fono a Malo o le Taupulega i le masina o Oketopa.
O i latou ia ua ta’ua o auxillary members, ma sa faaaogā foi i le taimi sa talimalo ai Samoa i le fono a Malo laiti tau atia’e o le lalolagi lea na faia i Samoa ia Setema o le tausaga e 2014.
Sa faaaogā foi auxillary members i le taligamalo a le atunuu i le taimi o taaloga a le Pasefika i le tausaga e 2019.
E faatauto i latou e pei lava o Malu o le Malo ae e iai vaega e lē oo iai lo latou malosi i le faatinoina o tiute faaleoleo.
E lē o faailoaina mai i le faasalalauga a le matagaluega i lana upega tafailagi pe toafia nisi ua talia mo le faia o lea tautua lagolago i alii ma tamaitai leoleo.
