Ua faia se saunoaga a le sooupu a le National i mataupu tau leoleo, e leai se mafuaaga e ala ai ona lē avea Niu Sila ma atunuu aupito i saogalemu i le lalolagi ae peitai o loo sese le vaega o loo agai atu iai.

O faamatalaga ia ua faia e Mark Mitchell i le mae’a o le faailoa mai e le malo o le isi 11 miliona o le a faaaoga i nisi o vaega tau le puipuiga mo pisinisi. 

O faamaumauga mai leoleo ua iloa ai ua siitia i le 55 pasene ua faatetele ai osofaiga o ram raids e faaaoga ai taavale e faaleaga ai pisinisi ona gaoia lea.

Ua ta’utino foi le Palemia o Chris Hipkins ua iai se siitaga tele i le aofai o osofaiga i faleoloa ma ia ioeina le faia iai o nisi gaioiga faaopoopo.

Fai mai Mitchell o le faafitauli sa’o lava o le malo lea e tatau ona o latou agai i ē o loo faatupuina faalavelave nei ma silasila i le ituaiga solitulafono o loo tupu mai.

Ua faailoa foi e le National o le a o latou folafola se isi polokalame fou e agai sa’o i le ausolitulafono tai 15-17 tausaga le matutua, e aveina ai i latou ia i aoga faamiliteli e ono oo le umi i le tausaga atoa e aveese ai mai kegi ma tuuina atu i ni polokalame e faia ai ni faaiuga lelei mo o latou olaga.