O le Iuni o loo tula’i mo tagata faigaluega i trains, trams ma pasi le RTBU ua o latou faailoa ua faalēaogāina a latou solo tetee e 8 sa fuafuaina.
O ananafi na saunoa ai le Premier o NSW, Chris Minns e ono lē taunuu le faia o mea faapāpā poo fireworks e masani ai i tausaga ta’itasi ona o le solo tetee o loo feta’ua’ina a le Iuni.
O le taimi nei o loo iloilo e le Fair Work Commission pe alagātatau ona faataga le faia o ia solo tetee ma o le asō o loo faatalitalia ai se faai’uga e tuu ane i lea mataupu.
Ua lipotia e le 9News se faamatalaga mai le RTBU o solo tetee ua faalēaogāina ua taofia seia oo i le aso 7 o Ianuari pe afai e ioe le malo i nisi o aiaiga e pei o le aveesea o lana submission ua i luma o le komisi su’esu’e ma le isi o le ioeina lea o le feoa’i fua o pasese i auala o femalagaa’iga lautele i NSW se’i vaganā ua autasi i se maliega fou e faatatau i lea mataupu.
E manatu le to’atele e leai se mafuaaga e ala ai ona lē oo fua le faia o mea faapāpā ua masani ai i tausaga ta’itasi ae ao ona galulue le malo ma le Iuni i le foiaina o le la mataupu.
E iai nisi lipoti lata mai ua ta’ua ai o le a taunuu pea ona faia mea faapāpā ae o le a iai foi isi solo tetee o le a faataunuuina pea.
Puna o Faamatalaga: https://www.9news.com.au/national/rail-union-offers-to-call-off-christmas-new-year-strikes/7c6b717d-94d7-4e7e-be01-16bd62578f47
