E manatu le asosi a le au faitaavale, le AA poo le Automobile Association e faasaoina tupe a le au totogi lafoga ma i latou e faaaogāina le alatele pe a faamuta loa le faia o stickers lea e faapipii i le faamalama pito i luma o taavale e faailoa ai le lesitala ma le warrant of fitness o le taavale ae faaaogā faiga faaonaponei ua iai.
Ua lipotia i le asō e le One News e foliga e tai faapea foi se finagalo o le Malo i lea mataupu.
O lesitala mo taavale ma le tau totogi mo le faaaogāina o le alatele o nisi ia o vaega tāua o loo faatupe ai poloketi tau femalagaa’iga a le Malo e pei ona ta’ua i le lipoti ma i se faamatalaga mai le NZ Autocar ua faaalia ai o ia tupe e faaopoopo ai pe ā ma le 470 miliona i le tala faatatau o le tupe a le malo.
Ae fai mai le AA o le system o loo iai nei i stickers ia e faapipii i faamalama ua tatau ona faamuta auā ua mātele ina faaaogā faiga faaonaponei, digital e faatino ai galuega.
Afai e taofia oe e se leoleo ua silafia lelei lava e le leoleo au totogi o le auala, road user charges e tatau ona totogi ae pe o lesitala foi lau taavale pe iai foi se warrant of fitness auā o loo faamauina uma ia faamaumauga i le lesitala o taavaleafi.
O le vaiaso na te’a nei e pei ona ta’ua i le lipoti na faailoa ai e le NZTA sa latou app o loo faailoa ai aso e uma ai lesitala o taavale ma tulaga uma tau taavale ma e manatu le AA e sili atu ona faigofie lea mo o latou sui, le au faitaavale.
Fai mai le One News sa afea le Minisita o Fela’ua’iga mo sona finagalo i le mataupu ma na ia ta’ua o loo silasila nei le malo i le faa digital uma o tulaga ia e pei o le lesitala ma le warrant of fitness o taavale.
Puna o Faamatalaga: https://www.1news.co.nz/2024/05/10/time-almost-up-for-wof-and-rego-stickers-on-our-windscreens
