O se tulaga na faateia ai le toatele ina ua ripotia mai le fai i lagi ai o le folauga a le afioga ia Fesola’i Vaaiga Tuigamala.

O Fesolai ua lauiloa i le lalolagi atoa i le taaloga lakapi ma ua iloga foi e tagata i le igoa “Inga the Winger”. E 19 taaloga na taalo ai Fesolai mo le All Blacks mai le tausaga e 1991 -1993 ma e 23 taaloga ma taalo ai mo le au a le atunuu le Manu Samoa mai le tausaga e 1996.

Na suia le taalo ai o Fesolai mai le Lakapi Iuni i le Lakapi Liki i le tausaga e 1993 lea na saini ai i le Kalapu a Wigan i le UK.

Ina ua faapolofesa le taaloga Lakapi Iuni i le tausaga e 1995, o Fesolai o se tasi o tama taaalo na toe foi i le Lakapi Iuni mai le Lakapi Liki ma taalo ai i le au a London Wasps ma manumalo ai i le English Premiereship, mulimuli ane taalo mo le au a le New Castle Falcons ma saini ai le maliega e 1miliona. I le sainia ai e Fesolai o le taalo ai i le Falcons na faaigoa ai e nisi o tama taalo o le au “simply the best rugby player in the world”

Na amanaia ana taumafaiga i luga o le malae taalo i le tausaga e 2008 ma avea ai o se sui o le New Zealand Order of Merit mo lana tautua i le lakapi ma le atunuu.

Ua iloga foi lea tamalii a le atunuu i lona talitonuga faakerisiano ma le malosi o lona talitonuga i le Atua lea na tele ina fesoasoani ai foi i se tasi o tama taalo na la galulue faatasi ia Jason Robinson.

O le afiafi o le Aso Tofi na salalau ai faamatalaga i le maliu ai o Fesolai masalomia ai se taotoga i le falemai ona o gasegase o le tino. Ripotia foi e nisi e le’i mamao atu foi ona teu lona tuafafine laititi lea na fai i lagi foi lana folauga i le 3 vaiaso talu ai. 

O Fesolai e telē lona sao ia Samoa e le gata o le auai i polokalame e talanoa ai i Lakapi ae sa faia foi se maea fusu faaigaoina o le Plantation Gym i Samoa o se galuega na galulue faaatsi ai ma nisi o lana fanau e unaia ai fanau laiti i Samoa o loo iai le naunautaiga e avea lea galuega poo le faipelega ma vaega taua o latou olaga poo le career.

E fai i lagi le folauga a Fesolai ua 52 tausaga o lona soifua. Toatele tagata ua molimoli atu a latou faamaisega i le aiga o Fesolai ma o le a manatua pea lea tamalii o le atunuu i lona sao ma lana tautua i le atunuu tauala atu i vaega eseese.