O le faaaliga lenei a le vaega o le Matagaluega o Faatoaga ma Faigafaiva e toe tapue ai le faia lea o fagaga moa i le atunuu mo le fofoga taumafa poo le faatauina atu.
Saunoa le Minisita o Faatoaga, Afioga Laaulialemalietoa Polataivao Fosi Schmidt i le tulaga e ao ai ona faatino lenei vaega tāua.
“O le mafaufauga numera tasi a le tatou Matagaluega ia lava moa i le atunuu.
“Ua tauau ina mou le mea nei o le lafu moa samoa ua mafuli tatou i le na o le savalivali atu lava i le faleoloa e faatau mai le pusamoa mai fafo.”
O le tāua o le polokalame lenei ina ia toe agai sa’o lava e aumai le tasi lenei o manulauti a le atunuu o fagaga moa.
“E le o manofonofo lelei le tatou vaega o lafumanu i Nuu, o le poloketi lenei e tatau ona toe faalautele.
“O le famoemoe lenei e tatau ona tatou toe tilotilo i le auala e faateleina ai moa a le atunuu ina ia matuā tele ma anoanoai moa mo le fofoga taumafa.
“Tasi lava le faamoemoega lea e iai i le lalolagi ia lava meaai (food security), ae o le mea lea e tupu i le taimi lenei ua tatou faalagolago tele i moa mai fafo.
“E leai lava se isi mea tatou te tua iai, tatou te tua lava ia tatou mea fafaga i lo tatou lotoifale.
“Fafaga ni au lava moa se 400, e te taumafa ai lava oe ia i aso uma ae o le faamalosi lena o le suiga foi lena e faaauau pea.”
Ta’ua e Laauli o lea foi e iai le faamoemoe i se tasi o poloketi o loo taimua ai nisi sui mai Saina e iai le tomai faapitoa i vaega tau lafumanu SCATAP i le faafaileleina o moa i Nuu e ao ai le fuamoa mai i moa Samoa ona tuuina lea i masini e fofoa ai mo le fā masina ona tufa lea i tua i fai lafumoa.
“O le manulauti sili lena i le taimi lenei ina ia aua ne’i toe iai ia tatou le ola faalagolago i moa mai fafo.
“E leai se tatou mea e mafai i le tau o le soifuaga ua siitia, silasila i le tau o le pusamoa ua siitia e le mafai ona tatou foia le tau ua iai o mea e gaosia mai atunuu i fafo.
“Pau le mea a le Malo e fai o le fesoasoani atu i atina’e ina ia faamāmā ai ma avatu mea e o tagata e tua iai ae o se upu i lo tatou puleaina o oloa mai fafo e le mafai.
“Lea ua uma ona fai le tatou fale meaai mo mea fafaga i uta i Nuu e agai iai le poloketi lena e maua ai le fesoasoani mo outou.”
Na talosaga foi le Afioga i le Minisita ina ia faia foi se faaaliga faapenei i le motu tele i Salafai.
