O le faai’uga o le masina talu ai na faatino ai faau’uga a nisi o i latou na a’otauina i le Manukau Institute of Technology & Unitec.
Ma o se faau’uga na ‘aifilofilo ai se tamā e suafa ia Su’a Muliagatele Taliaoa Falaniko Leiataua, o sē ua tele tausaga o galuega o se ofisa sinia i le Ofisa o Femalagaa‘iga i Samoa, na faau‘u mai i se tikeri i matāupu faapisinisi.
O se matāti’a maoa’e lea mo lenei tamā, i le tele o lu’itau na feagai ma ia, ae peita’i na ia finau lava ina ia maua se faailoga maualuga, i le tuua ai foi o se galuega ua silia ma le 25 tausaga o galue punoua’i ai.
I se pepa o faamatalaga mai le Iunivesite o Matāupu tau matātā eseese na ia faailo ai lona malaga mai i Niu Sila i le taimi o pepesi le faama‘i o le Koviti-19, e faatasi mai i si ona aiga.
Na ia faaalia, o fuafuaga i lena taimi o le tilotilo lava e sa’ili galuega ma galue ai, ae peita’i na suia lona mafaufau ma aga’i loa e faaauau a’oa’oga, amata i vasega e a’oa’oina le gagana Peretania, ma oo atu lava i matāupu tau tipiloma ma aga’i atu ai lava e faatino lana tikerī.
Ua faailoa mai o lea ua aga’i le tamā e faatino sa’ili’iliga ma a’oa’oga maualuluga i le matāupu o matua o faiva, poo Master of Applied Business in Human Resources.
Na faaalia le tele o lu’itau na fetaia’i a o iai i a’oa’oga peita’i o lona naunauta’iga ia faalaua’iteleina pea lona tomai e ala i le faaauau ai o ana a’oa’oga.
