O le asō na faauu ai ma Akiepikopō o le Puleaga Samoa-Apia le afioga Patele Mosese Vitolio Tui.

O lea faamoemoe sa faataunuuina e ala i le Taulaga Paia o le Misasā sa osia lea e le Epikopo faamalumalu sa ia tausia le Puleaga a o tālia ai le faauuina o le Akiepikopō filifilia.

Sa auai le failautusi mo le sui o le Tamā Paia o ia mai le itulagi lenei o Ausetalia ma le Pasefika sa ia tolaulauina le tusi mai le Vatikano o le filifilia ai o Akiepikopō Mosese Vitolio Tui.

Sa auai foi le Epikopō o le Puleaga Aukilani ia Bishop Stephen Lowe, o le Afioga ia Epikopō Kolio Tumanuvae Etuale mai le Puleaga Samoa Pago Pago, atoa ai ma Katinale Soane Patita Paini Mafi mai Toga.

O lea sauniga sa auai iai le malo e ala i le Afioga i le Ao Mamalu o le Malo o Samoa, Afioga Tuiaana Tuimalealiifano Vaaleto’a Sualauvī II ma lana Masiofo.

O le Sui o le fono a sui tofia, Afioga Lemamea Ropati Mualia ma lona faletua.

O le Palemia o Samoa, Afioga Fiamē Dr Naomi Mataafa ma Minisita o le Kapeneta.

Faapea le Faamasino Sili, Afioga Satiu Simativa Perese ma le Peresitene o le Faamasinoga o Fanua ma Suafa, Afioga Lesatele Rapi Vaai ma nisi o Faipule o le Palemene.

O le taulaga Paia o le Misasā na amata i le 10:30 i le taeao analeila, ae na faai’u ua te’a le 12 i le aoauli.

O le aufaipese a St Paul’s Parish, Massey & Ranui mai Niu Sila sa malaga mai mo le peseina o le Taulaga Paia o le Misasā.

O Akiepikopō Mosese Vitolio Tui o se ositaulaga o le Ituaiga o Salesians of Don Bosco.

O lana mau tauave o lona tofiga “Vivii lo’u loto i le Alii”.

O se faaosofiaga mai le miti a Sagato Ioane Poseko i poutū e lua e faamanatu ai pea i le ituaiga o Salesio ina ia taula iai lo latou faatuatua o le “Eukalisitia” ma le “Tinā Paia o Maria”.

Sa faai’u le asō i faaaloaloga a le Puleaga mo malo faaaloalogia ma faafiafiaga mai tupulaga talavou a le Puleaga Faa-Akiepikopō Samoa-Apia.