O le faletalimalo o le Stevenson i Manase o le a avea ma nofoaga e faaulu ai suafa o sui tauva mo le motu o Savaii auā le palota laititi a le itumalo o Gagaifomauga Numera 2.
Ua faailoa e le sui komesina o faigapalota le tofa Lefau Francis Ainuu i le faasalalauga mai le ofisa o le komisi o faigapalota, o le a tatala le ofisa lē tumau i le faletalimalo o le Stevenson i le Aso Tofi nei mo lea faamoemoe mai le 9 i le taeao ae tapunia i le 5 i le afiafi.
O le a avanoa foi le ofisa o le komisi o faigapalota i Mulinuu mo le faauluina o sui faatutū i le Aso Faraile nei mai le 9 i le taeao i le 12 i le aoauli. O le a faato’ā iloa i le mae’a o lea galuega pe toafia ni sui o le a faaulu atu suafa mo lea palota laititi ae o ā foi vaega faaupufai o le a tauva ai sui faatutū.
